សមាគមស្នាមញញឹមថ្មីនៃក្តីសង្ឃឹមរបស់កុមារ
សមាគមស្នាមញញឹមថ្មីនៃក្តីសង្ឃឹមរបស់កុមារ ទទួលសម្ភារៈសិក្សាពីសាលារៀនខូលីងវូដភ្នំពេញ
ដូចការគ្រោងទុកនៅថ្ងៃទី១០ ខែមេសា ឆ្នាំ២០២៦ សិស្សថ្នាក់ទី១២ នៃសាលារៀនខូលីងវូដភ្នំពេញ សហការជាមួយលោកគ្រូ អ្នកគ្រូ បាននាំយកអំណោយគ្រឿងឧបភោគបរិភោគ សៀវភៅ កាតាប សម្ភារៈសិក្សា
សម្ភារៈប្រើប្រាស់ និងថវិកាមួយចំនួន ដែលជាជំនួយឧបត្ថម្ភពីសិស្សានុសិស្សសាលារៀនខូលីងវូដភ្នំពេញ និងសាធារណជន ទៅចែកជូនដល់កុមារកំព្រាចំនួន ១៣៥នាក់ នៅសមាគមស្នាមញញឹមថ្មីនៃក្តីសង្ឃឹមរបស់កុមារ ដែលស្ថិតនៅស្រុកកណ្ដាលស្ទឹង ខេត្តកណ្ដាល។
លោក ង៉ែត សេម នាយករងនៃសាលារៀនខូលីងវូដភ្នំពេញ បានមានប្រសាសន៍ថា៖ អំណោយដែលបានផ្តល់ជូននេះ គឺជាការខិតខំប្រឹងប្រែងផ្ទាល់របស់សិស្សថ្នាក់ទី១២ និងមានការចូលរួមពីសំណាក់លោកគ្រូ អ្នកគ្រូ និងសិស្សានុសិស្សដទៃទៀត រួមទាំងមាតាបិតាសិស្សផងដែរ។
យុវសិស្ស ហ៊ត់ រតនៈវិសាល តំណាងសិស្សថ្នាក់ទី១២ បានឱ្យដឹងថា គោលបំណងដ៏ធំរបស់ពួកគេនៅថ្ងៃនេះ គឺដើម្បីចូលរួមដោះស្រាយសេចក្តីត្រូវការរបស់ក្មេងៗដែលកំពុងតែរស់នៅក្នុងសមាគមស្នាមញញឹមថ្មីនៃក្តីសង្ឃឹមរបស់កុមារ ដែលភាគច្រើនជាក្មេងកំព្រា។
គួរជម្រាបជូនថា នេះជាការរួមចំណែកដ៏សំខាន់ក្នុងការអភិវឌ្ឍសង្គមជាតិ ដោយការងារសប្បុរសធម៌។ ម្យ៉ាងវិញទៀតគោលបំណងនៅថ្ងៃនេះ គឺចង់ផ្តល់នូវក្តីស្រឡាញ់ និងស្នាមញញឹមដល់កុមារ។ សកម្មភាពនេះបង្ហាញការយកចិត្តទុកដាក់ ការអាណិតអាសូរ បង្កើនភាពស្និទ្ធស្នាល និងបង្កើតអនុស្សាវរីយ៍ល្អៗក្នុងនាមជាកូនខ្មែរទាំងអស់គ្នា។